لاهنت ...

بواسطة Clip Birds يوم الجمعة، 29 مايو، 2009 القسم : 2 التعليقات

لاهنت ياراس الرجاجيل لاهنت" "لاهان راس فى ثرى العود مدفون

والله ماحطك بالقبر لكن أمنت" "باللي جعل دفن المسلمين مسنـــــون

سكنت دار المجد ياشيخ وأسكنت" "شعبك معك فى منزل العز ممـن

منزلك ياعز الشرف لو تمكنت" "فوق النجوم اللي تعلت على الكون

صنت العهد ياوافى العهد ماخنت" "علمتهم وشلون الاشراف يوفون

كم ظالم عاداك واعفيت واحسنت" "واخلفت ظن اجموع ناس يظنون

شلت الامانه حافظ ما تهاونت" "شفنا بك رجال على النفس يــــقوون

ياللي طلبه الملك بالحب زينت" "عرشك بتاج قلوب شعب يحـــــبون

لونت تاج الملك ما قد تلونت" "ماغرتك دنياك ماصرت مفتــــــــون

بالزهد والمعروف والصبر كونت" "منهاج فيصل منهج اللي يعدلون

تلفتت روس المخاليق وين أنت" "وين العظيم وعود الشوف مطعون

كم خافق وقف عقب ما تكفنت" "وكم ناظر ذوب سواداه محـــــزون

لو شفت حال الناس عقبك تبينت" "مقدار حب الناس للي يـــــودون

مما بقلبي قلت يابوي لاهنت" "والانت فوق القول مهما يقولــــــون


شعر الأمير خالد الفيصل

2 التعليقات:

الحزن يقول...

صح لسآن الشآعر خآلد الفيصل ..
كلمآ قوية قوية قوية .. وفي منتهى اروعة والشموخ والعز والإفتخآر ..
ليت جيلي تعآيش مع جيل ذلكـ الملكـ القوي اللذي نفتخر فيهـ وهو في قبرهـ ..
ولكن يكفي لنآ فخرآ أن نسمع أمجآدة وعزتهـ وقوتهـ
رحمكـ اللهـ يآ فيصل .. ورحم موتى المسلمين أجمعين

نآفذة قوية .. دمتي بحفظهـ يآ رب

هند المسند يقول...

ليس من الشرط أن تعيش بجيل الأقوياء لتفخر بهم ..
بل يكفي أن هذا الجيل عاش على هذه الأرض
لك شكري يا( الحزن ) على المرور الدائم والتعليق الرائع الذي لايخلو من روح جميلة

إرسال تعليق